Gjatë vizitës zyrtare në Paris të Francës, kryetari i Lidhjes Demokratike të Kosovës, Lumir Abdixhiku zhvilloi takime në Pallatin Presidencial Élysée, në Ministri të Punëve të Jashtme, dhe në Senatin francez.

Abdixhiku u prit në Pallatin Presidencial Élysée, nga Këshilltarja e Presidentit Macron, Isabelle Dumont; në Ministri të Punëve të Jashtme nga zëvendësdrejtori për Evropën Kontinentale, Sylvain Guiaugue; derisa në senat nga Senatorja Sénatrice Laure Darcos, kryetare e Grupit të Miqësisë Francë – Kosovë.

Përmes një komunikate për media nga LDK bëhet e ditur se në këto takime, kryetari i LDK-së, shprehu falenderimet për mbështetjen e shtetit francez në të gjitha periudhat shtetndërtuese të Republikës së Kosovës.

Abdixhiku në këto takime ritheksoi qëndrimet e LDK-së mbi procesin e dialogut, si një proces të cilin vendi ynë duhet ta trajtojë me prioritet si mjet drejt arritjes së një marrëveshje përfundimtare dhe ligjërisht të obligueshme, me njohjen në qendër të saj.

Implementimi i marrëveshjeve paraprake, konform rendit kushtetues të Republikës së Kosovës nuk kanë alternativë.

Abdixhiku ka shtruar po ashtu, domosdoshmërinë e hapjes së rrugës së re, drejt integrimit euroatlantik, me theks të veçantë, anëtarësimin sa më të shpejtë të Kosovës në NATO; dhe mbështetjen që Franca mund ta jep në këtë drejtim.

Në të gjitha takimet, u fol edhe për interesimin e shtuar francez për investime ekonomike në Kosovë dhe gjithë Ballkanin Perëndimor./arbresh.info