Gazetari Lirim Mehmetaj ka njoftuar mbrëmë se është ftuar si i pandehur për veprën penale “nxitje të përçarjes dhe mosdurimit” nga Neni 141 i KPR-së.

Një gjë e tillë ka shkaktuar reagime të shumta në opinionin publik, shkruan Arbresh.info.

Reagime ka pasur edhe nga Asociacioni i Gazetarëve (AGK) i cili tha se një thirrje e tillë është alarm për një shoqëri demokratike.

Lidhur me rastin ka reaguar edhe Prokuroria Themelore në Prishtinë e cila ka njoftuar se ka përcjellë me vëmendje debatin e zhvilluar në opinionin publik lidhur me çështjen e gazetarit.

Sipas njoftimit, Prokuroria Themelore në Prishtinë ka pranuar Kallëzim penal privat kundër L.M. nga pala e dëmtuar D.M, shkruan Arbresh.info.

“Andaj, njoftojmë opinionin publik se veprimet e ndërmarra në këtë çështje janë në drejtim të trajtimit të Kallëzimit penal, për të cilën Prokurori i Shtetit ka obligim ligjor të trajtoj dhe sqaroj të gjitha rrethanat të cilat pretendohen nga palët e përfshira në proceset që zhvillohen para Prokurorit të Shtetit.”, thuhet në njoftim.

Prokuroria thekson se në këtë situatë kryeprokuorori, Zejnullah Gashi do të analizojë veprimet e prokurories së rastit.

“Megjithatë, në situatën konkrete, Kryeprokurori i Prokurorisë Themelore në Prishtinë, z. Zejnullah Gashi, do të analizoj veprimet e prokurores së rastit për këtë çështje dhe do të vlerësoj nëse eventualisht ka tejkalim të kompetencave që nuk janë në përputhje me ligjin.”, thuhet ndër të tjera.

“Prokurori i Shtetit mbetet i përkushtuar për respektimin e lirisë së shprehjes dhe të drejtave të tjera të njeriut të cilat janë të garantuara me Kushtetutë dhe ligjet në fuqi.”, thuhet në njoftim./Arbresh.info/