Aktivistë të partive opozitare në anën e Dukagjinit, treguan se janë të vendosur që të përkrahin liderët e tyre në protestën e 17 Shkurtit. Rinia e Aleancës për Ardhmërinë e Kosovës, Vetëvendosjes dhe Nismës, u mblodhën sot në Gjakovë, bënë thirrje për dalje masive në protestë dhe për rrëzim sa më të shpejtë të Qeverisë Mustafa-Thaçi.

Para rinisë së Dukagjinit foli edhe Glauk Konjufca i Vetëvendosjes, ku tha se opozita e bashkuar është fuqi politike e cila do të ndryshojë realitetin e sotëm në Kosovë.

Konjufca tha se ose duhet hequr dorë nga marrëveshjet, ose të bëhet referendum, ose të shkohet në zgjedhje të parakohshme.

“Në protestën e 17 Shkurtit për t’i bërë edhe në herë thirrje Qeverisë së Kosovës, kjo është ndër herët e fundit, që i ka përpara tre zgjidhje; zgjidhja e parë është të heqim dorë prej marrëveshjeve, zgjidhja e dytë është referendumi dhe zgjidhja e tretë është zgjedhjet e reja në Kosovë. Për arsye se nuk mund të vazhdojnë të qeverisin me Kosovën edhe njerëz që e kanë shke lë Kushtetutën, edhe që kanë marrë vendime të dëmshme për vendin dhe ata që e kanë coptu vendin. Ata edhe njëherë duhet të dalin në popull, t’i prezantojnë qëllimet e veta të këqija e pastaj të shohin çka po mendon populli për ta. Këto mundësi i ka Qeveria e Kosovës”, tha ai.

Ai tha se ndryshimi për të cilin ka nevojë Kosova, është heqja e njerëzve, siç i quajti ai të korruptuar e të papërgjegjshëm nga udhëheqja e shtetit.

Edhe kryetari i Aleancës së të Rinjve në Gjakovë, Aremnd Shabanaj, ftoi të gjithë rininë që të bashkohen për ndërrimin e qeverisë.

“Jam i bindur që me ndërrimin e kësaj qeverie, do të ndërroj shumëçka në Kosovë, do të ndërroj edhe gjendja jonë si rini. Sot është një frymë shprese, dhe këtë frymë e solli opozita e bashkuar me qëndrimet e saj të drejta dhe të qëndrueshme. Ne si rini na mbetët të bëhemi bashkë dhe të mbështesim kauzën e drejtë për të sotmen dhe të nesërmen tonë. Duke e parë që kjo qeveri nuk ka ndërgjegje, sepse ata me kohë e kanë vrarë ata, kemi vendosë të protestojmë në mënyrë paqësore me 17 shkurt”, tha ai.

Duke thënë se qeveria aktuale është anti-kushtetuese, kryetari i Nismës për Kosovën në Gjakovë, Fazli Hoxha tha se marrëveshja për Demarkacionin me Malin e zi dhe ajo me Serbinë për formimin e Asociacionit të komunave me shumicë serbe në Kosovë, duhet të anulohen meqë nuk paraqesin asnjë interes për qytetarët e Kosovës.

“Nuk duhet me kursy asgjë që me datën 17 Shkurt, edhe një herë të ia bëjme me dije Qeverisë se populli nuk duron më. Është momenti i fundit, edhe ata duhet të marrin vendim për të mirën e shtetit të Kosovës”, tha ai.

Në takimin e strukturave nga opozita në Gjakovë që për qëllim pati mobilizimin për protestën e 17 Shkurtit, u tha se do të dalin përtej vetës, për të mbrojtur Kushtetutën e vendit.