Drejtori i Përgjithshëm i Policisë së Kosovës, Gazmend Hoxha, gjatë ceremonisë së diplomimit të gjeneratës së 62-të të Policisë së Kosovës, ka folur për rastin tragjik që ndodhi në Lipjan, ku një 27-vjeçar humbi jetën në duart e pesë pjesëtarëve të Policisë së Kosovës.

Hoxha theksoi se nuk do të tolerohet asnjë tejkalim i autorizimeve policore dhe kërkoi nga Inspektorati Policor i Kosovës, si dhe nga strukturat e brendshme hetimore të Policisë dhe institucionet tjera përkatëse, që të përdorin të gjitha burimet e nevojshme për zbardhjen e plotë të rastit.

Ai bëri thirrje për bashkëpunim të ngushtë mes hetuesve të Policisë së Kosovës dhe IPK-së, në mënyrë që të sigurohet një pasqyrë e qartë dhe e saktë e asaj që ndodhi në natën kritike në Lipjan.

“Nga pozita e drejtorit të Policisë s’do të lejojmë çfarëdo forme të tejkalimit të autorizimeve policore, andaj kërkoj fuqishëm që Inspektorati Policor i Kosovës, hetimet tona të brendshme dhe institucionet e tjera relevante të përdorin të gjitha burimet e nevojshme për të hetuar rrethanat e vdekjes së qytetarit tonë. Hetuesit tanë janë urdhëruar të bashkëpunojnë ngushtë me IPK-në për të siguruar një pasqyrë të saktë të këtij rasti fatkeq”, tha ai./Arbresh.info