Një status që kritikoi shpenzimet e deputetëve për karburant dhe paraqitja e problemit të mos pagesës së shtesave dhe shujtave për Policinë e Kosovës përmes një postimi në Facebook, i kushtoi me suspendim nga puna policit, Amir Hoxha.

Suspendimi treditor i policit Hoxha ngjalli reagime të mëdha në vend.

Njohësi i çështjeve të sigurisë në vend, Drizan Shala për arbresh.info tha se ky rast është trajtuar si veprim politikë.

“Një veprim i tillë është trajtuar si veprim politikë dhe ku dihet që zyrtarët politik nuk mund të prononcohen dhe të marrin anime politike”, tha Shala.

Tutje Shala tha se suspendimi i policit në fjalë është me vend në aspektin administrativë.

“Në aspektin administrativë vendimi i tillë është korrekt”, deklaroi Shala.

Në anën tjetër edhe njohësi i çështjeve të sigurisë në Kosovë, Bedri Elezi tha se polici në fjalë nuk ka folur në vetën e parë por ka përfshirë Policinë e Kosovës, dhe krahasimi i tij nuk ka qenë adekuat me rastin për të cilin ai ka reaguar.

“Për policinë në fjalë është një tentativë e drejtpërdrejt për të cenuar të drejtën e qytetarëve për të dhënë mendimet e tij. Ai ka deklaruar si qytetarë dhe njëkohësisht nuk ka folur për vetën por ka folur për të gjithë policinë e Kosovës për një çështje e cila është e rregulluar me ligj dhe ka bërë një krahasim i cili nuk është i sanksionuar me kodin penal apo me rregulloren e policisë së Kosovës”, tha Elezi për arbresh.info

Lidhur me ketë çështje arbresh.info ka tentuar të kontaktojë edhe me Sindikatën e Policisë së Kosovës, e po ashtu edhe me Policin e Kosovës, por nuk kanë dhënë ndonjë përgjigje, por vetëm pas disa orëve duke reaguar përmes komunikatave për medie.

Ndërsa, reagimi i parë ishte nga Inspektorati Policor i Kosovës lidhur me suspendimin prej tri ditësh të zyrtarit policor Amir Hoxha,  ku kanë thënë se nuk janë duke e trajtuar këtë rast dhe se nuk kanë bërë ndonjë rekomandim për suspendimin e tij.

Sipas IPK-së, Hoxha është suspenduar nga Policia e Kosovës.

Kujtojmë se, reagimi i policit tashmë të suspenduar Amir Hoxha erdhi pas publikimit të shifrave enorme të harxhimeve të deputeteve të Kosovës për karburante, ku Hoxha kishte kritikuar veprimet e tyre dhe më këtë po u bëhej e padrejtë policëve, ku vuri në pah edhe mos pagesën e shujtave për policët.

Vetë Hoxha bëri të ditur suspendimin e tij në rrjetin e tij social Facebook.

“Sapo mora njoftimin për suspendim të përkohshëm timin në afat prej tre ditësh lidhur me një postim qe e kam bërë me datën 04.02.2022 në lidhje me pakënaqësinë time për mos-pagesën e shujtave për policët ne kryerje të detyrës e qe ligjërisht na takojnë”, kishte shkruar Hoxha./F.B/arbresh.info/