Gjykata Themelore në Prishtinë, Departamenti Special ka aprovuar kërkesën e Prokurorisë Speciale të Republikës së Kosovës, duke ua caktuar masën e paraburgimit në kohëzgjatje prej 30 ditësh (secilit veç e veç) të dyshuarve A.K dhe I.H., të dyshuar për kanosje me vrasje ndaj pjesëtarëve të KFOR-it italian në Lubiqevë të Prizrenit.

Lajmi u bë i ditur përmes një komunikate për medie nga kjo Gjykatë, raporton “Betimi për Drejtësi”.

Në njoftim thuhet se gjyqtari i procedurës paraprake, ka aprovuar si të bazuar kërkesën e PSRK-së dhe të dyshuarve iu caktua masa e paraburgimit në harmoni me nenin 184, paragrafi 1, nënparagrafi 1.1 e 1.2 pika 1.2.1,1.2.2 dhe 1.2.3 të KPP-së.

“Të pandehurit A.K dhe I.H dyshohen se në bashkëkryerje me datë 26.02.2024 rreth orës 10:00 në një kafiteri në fshatin Lubiqevë, në Komunën e Prizrenit, kishin ofenduar dhe pastaj kishin kanosur seriozisht pjesëtarët e KFOR-it Italian se do ti vrasin, e të cilët janë në mision paqeruajtës në Kosovë me mandat të OKB-së dhe duke marr për bazë faktin se vepra penale për të cilën dyshohen ka ndodhur ndaj pjesëtarëve të KFOR-it, të cilët veprojnë në Kosovë për të garantuar një mjedis të qetë dhe të sigurt, si dhe për lirinë e lëvizjes për qytetarët e Kosovës, andaj ekziston rreziku real se me qëndrimin e tyre në liri, të njëjtit mund të përsërisin veprën penale apo të përfundojnë veprën e kanosur”, thuhet në njoftim.

Më tej, thuhet se sipas vlerësimit të gjykatës, caktimi i paraburgimit ndaj të pandehurve në këtë fazë të procedurës penale është mëse i arsyeshëm dhe i domosdoshëm për zbatim me sukses dhe efektiv të kësaj procedure penale dhe sigurimin e prezencës së të pandehurve në procedurë.

A.K dhe I.H dyshohen se kanë kryer veprën penale “Rrezikimi i personelit të Organizatës së Kombeve të Bashkuara dhe i personelit në marrëdhënie me to” në bashkëkryerje, nga neni 168, paragrafi 4 lidhur me paragrafin 1, lidhur me nenin 31 të Kodit Penal të Republikës së Kosovës.

Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.

Ndryshe, Policia e Kosovës njoftoi të hënën se dy të dyshuarit janë arrestuar dhe dërguar në mbajtje.