Policia e Kosovës njofton se kanë identifikuar dhe arrestuar një person i cili dyshohet se kishte shkaktuar aksident me datën 17.02.2025 në rrugën nacionale Mitrovicë-Jarinjë, saktësisht në fshatin Dren.

Në njoftim thuhet se i arrestuari me inicialet D.V është intervistuar dhe gjatë verifikimit në bazën e të dhënave të policisë, është konstatuar se i njëjti ka drejtuar automjetin nën masën e shqiptuar për ndalim të ngasjes, përcjell Arbresh.info.

“Njësia Rajonale e Trafikut Rrugor Mitrovicë Veri, ka arritur të identifikojë personin dhe automjetin e përfshirë në aksidentin e datës 17.02.2025 në mes dy veturave, i cili kishte ndodhur në rrugën Nacional Mitrovicë-Jarinje më saktësisht në fshatin Dren, pas shkaktimit të aksidentit drejtuesi i dyshuar ishte larguar nga vendi i ngjarjes”, thuhet në njoftim.

“Pas hetimeve dhe verifikimeve profesionale të kryera nga zyrtarët policorë, është identifikuar i dyshuari D.V., i lindur në vitin 1972 i cili është intervistuar në lidhje me aksidentin dhe largimin nga vendi i ngjarjes. Rasti është proceduar sipas procedurës së rregullt dhe i njëjti është dërguar në Gjykatën për Kundërvajtje”, njofton policia.

“Gjatë verifikimit në bazën e të dhënave të Policisë, është konstatuar se i dyshuari ka qenë duke drejtuar automjetin nën masën e shqiptuar për ndalimin e ngasjes së automjeteve. Për këtë arsye, ndaj tij është shqiptuar kundërvajtje sipas Ligjit të Trafikut Rrugor. Policia e Kosovës mbetet e përkushtuar që të ofroj shërbim ndaj qytetarëve në gjithë territorin e vendit pa dallim”, thuhet në fund të njoftimit./Arbresh.info