Kryeministri i Republikës së Kosovës, Albin Kurti, përmes një postimi në Facebook, ka thënë se tashmë qytetarët e Kosovës do të mund të kalojnë kufirin pa pengesa, ngarkesa e vonesa.

Kurti tha se fryma e bisedimeve parimore e të barabarta në Bruksel është reciprociteti.

“Zgjidhjet normalizuese duhet ta kenë reciprocitetin përbrenda, teksa marrëdhëniet e mira fqinjësore e nënkuptojnë atë”, shkroi Kurti.

Ai falënderoi ndërmjetësit Borrell, Lajçak e Escobar e në veçanti ambasadorin e amerikan në Kosovë, Jeff Hovenier për siç tha, angazhimin e kontributin.

“Ju falënderoj të gjithëve për mbështetjen dhe durimin, posaçërisht në këto katër javët e fundit”, shkroi Kurti./arbresh.info/

Postimi i plotë:

Qytetarët e Republikës së Kosovës, me dokumente identifikimi (ID) të lëshuara nga shteti ynë, do të mund të kalojnë pa pengesa, ngarkesa e vonesa kufirin me Serbinë në të gjitha vendkalimet kufitare.

Njësoj do të vlejë edhe për kahjen e kundërt me rastin e hyrjes në Kosovë me dokumente identifikimi (ID) të lëshuara nga autoritetet e Serbisë.

Ju falënderoj të gjithëve për mbështetjen dhe durimin, posaçërisht në këto katër javët e fundit.

Fryma e bisedimeve parimore e të barabarta në Bruksel është reciprociteti. Zgjidhjet normalizuese duhet ta kenë reciprocitetin përbrenda, teksa marrëdhëniet e mira fqinjësore e nënkuptojnë atë.

Falënderoj ndërmjetësit, zotërinjtë Borrell, Lajçak dhe Escobar, e sidomos ambasadorin amerikan Hovenier për angazhimin dhe kontributin.