Asociacioni i Gazetarëve të Kosovës (AGK) ka reaguar ndaj deklaratës së zëvendëskryeministrit, Besnik Bislimi i cili tha se “Fjala lëshim është përdorur qëllimisht nga media kosovare që kanë financim nga Serbia për me i dhanë konotacion…”

Këtë deklaratë të Bislimit, AGK-ja e ka vlerësuar si të rrezikshme dhe të papranueshme, shkruan Arbresh.info.

“Deklaratë e rrezikshme dhe e papranueshme e zv/kryeministrit Bislimi kundër medieve të Kosovës. Jo për herë të parë, zv/kryeministri i parë i Qeverisë së Kosovës, që udhëheq me negociatat me Serbinë, Besnik Bislimi ka sulmuar mediet kosovare, duke e bërë akuzën e rrezikshme se ato “financohen nga Serbia””, thuhet në reagimin e AGK-së.

Tutje, AGK-ja me anë të këtij reagimi ka dënuar ashpër gjuhën e zëvendëskryeministrit Bislimi, duke thënë se vë në rrezik serioz dhe fizik gazetarët e medieve kosovare.

“AGK-ja, e dënon ashpër këtë gjuhë të papranueshme të njeriut të dytë të Qeverisë, dhe vë në pah se kur vjen nga niveli më i lartë i pushtetit vë në rrezik serioz, edhe fizik gazetarët e medieve kosovare.”, thuhet tutje.

“Qeveria Kurti duhet të ndalojë së sulmuari mediet kosovare, dhe të lejojë ato ta bëjnë punën e tyre, duke përfshirë komponentin shumë të rëndësishëm të mbajtjes përgjegjës të pushtetit.”, ka thënë ndër të tjera Asociacioni i Gazetarëve./Arbresh.info