Sot shënohen 11 vjet nga anëtarësimi i Kosovës në Organizatën Ndërkombëtare të Frankofonisë, një prej organizatave më të mëdha ndërkombëtare me 77 shtete anëtare. Ish-ministri i Jashtëm, Enver Hoxhaj, ka kujtuar këtë moment si një nga arritjet më të rëndësishme diplomatike të Kosovës.

“Para 11 vitesh, e çuam Kosovën në Frankofoni, një nga organizatat më të mëdha ndërkombëtare. Si Ministër i Jashtëm, e udhëheqa këtë proces me muaj pune, negociatash dhe lobimi, sepse Kosova duhej të kishte vend në tryezat ku merren vendime,” ka deklaruar Hoxhaj.

Ai thekson se anëtarësimi i vitit 2014 ishte dëshmi se Kosova mund të funksionojë si aktor i barabartë në arenën ndërkombëtare.

“Ishte provë se Kosova mund të njihet, të dëgjohet dhe të trajtohet si partnere e barabartë,” ka shtuar ai.

Hoxhaj nënvizon se është koha që diplomacia kosovare t’i rikthehet standardeve të asaj periudhe.

“Kosova ka kapacitet të anëtarësohet në Këshillin e Evropës dhe organizata të tjera ku e ka vendin. Me vizion dhe lidership të qartë, këto suksese i kthejmë në realitet,” tha ai.