As vetë s’e mban mend kur ka dëgjuar operë për herë të parë. Kishte kaluar një fëmijëri jo fort të zakonshme. Ishte rritur prapa skenave të njohura, në të cilat ngjitej e ëma e saj.

Marigona Qerkezi (22) është sopranoja që tashmë ka bërë emër në muzikën klasike. Karriera e saj e dyfishtë prej sopranoje e flautisteje, përfshin koncerte recitale, çmime ndërkombëtare e debutim në skena me renome në botë. Të fundit performancë e pati në Operën Mbretërore në Muscat të Omanit (Royal Opera Houese Muscat).

Debutoi me rolin e Mbretëreshës së Natës në “Fyellin magjik” të Wolfgang Amadeus Mozart. Kritika i ka dhënë epitetin “zë i artë”. Në një bisedë për “Kohën Ditore”, Qerkezi rrëfen sesi frymëzimi i saj për t’iu dedikuar këtij profesioni është ngjizur qysh herët.

E rritur në skenë

“Kam pasur fatin e madh që fëmijëria ime shumë e hershme është rrethuar gjithmonë prej muzikës klasike, operave të ndryshme, shfaqjeve operistike, koncertale etj., në shtëpitë e mëdha operistike në botë, kudo që ka koncertuar nëna ime”, nis rrëfimin Qerkezi, e cila është e bija e mexosopranos së njohur Merita Juniku. E ishte e pashmangshme që kjo eksperiencë të mos ndikonte në zhvillimin e saj. Edhe në dëshirën që të përcaktohej për këtë profesion.
“Për herë të parë kam dalë në skenë kur kam qenë 6-vjeçare me një koncert në Lubjanë. Ka qenë performanca ime e parë dhe më kujtohet që publiku ishte i entuziazmuar për një moshë aq të vogël”, thotë ajo, shkruan KD.
Siç rrëfen Qerkezi, është ndjenjë e veçantë të rritesh në ambiente ku realizohen shfaqje operistike, duke vrojtuar me shumë kureshtje punën e madhe që bëhet prapa kuintave. Kur ajo ishte në moshë të re, e ëma e saj po bënte karrierë në skena operistike në Zagreb e Lubjanë.