Rreth 250 persona çdo ditë kanë udhëtuar me tren brenda territorit të Kosovës.

Vetëm në tre muajt e parë të këtij viti i numri i pasagjerëve që kanë shfrytëzuar trenin si mjet udhëtimi është rreth 21 mijë, shkruan arbresh.info.

Por, krahasuar me vitin që lamë pas ky numër është zvogëluar për 27.42%.

Ndërsa ndër arsyet e rënies së përdoruesve të trenit duket se ka qenë ndërprerja e transportit të udhëtarëve si masë e marrë për parandalimin e përhapjes së kroonavirusit.

Kështu bëhet e ditur në raportin “Statistikat e Transportit dhe Telekomunikimit” për tremujorin e parë (TM1 2020) të publikuar nga Agjencia e
Statistikave të Kosovës (ASK).

Në tremujorin e parë (TM1) të vitit 2020, numri i pasagjerëve që kanë shfrytëzuar trenin si mjet udhëtimi është rreth 21 mijë, ku krahasuar me TM1 2019, numri i udhëtarëve është zvogëluar për 27.42%. Kjo ka ardhur si rezultat i vendimit të Qeverisë (në muajin mars) për masat e ndërmarra në luftimin e COVID-19, ku është ndërprerë transporti i udhëtarëve”, thuhet në raport.

Edhe transporti i mallrave përmes trenit ka rënë dukshëm këtë vit.

Në periudhën janar-mars të 2020-es janë transportuar rreth 101 mijë ton mallra , krahasuar me tremujorin e parë të vitit 2019 kemi ulje për 26 %.

Ndryshe në territorin e Kosovës ka gjithsej 333 km binar hekurudhor për transport.

Në hekurudhat e vendit qarkullojnë gjithsej 9 lokomotiva, prej tyre shtatë disell dhe dy trena motorik. Lokomotivat bartin 10 vagonë për udhëtarë dhe 1420 vagonë për mallra./arbresh.info/