Për gati një dekadë, kryeqyteti i Libisë, Tripoli, ka qenë qendër e një konflikti të gjatë e të mundimshme.

Ditët e rënda të revolucionit të vitit 2011, me të cilin u rrëzua nga pushteti diktatori Muammar Gaddafi, kanë kaluar moti. Megjithatë, vendi po përballet me luftë për pushtet, ku janë përfshirë grupe të armatosura, qeveri rivale dhe aktorë të huaj.

Vala e fundit e betejave filloi në muajin prill, kur komandanti Khalifa Haftar i dërgoi forcat e veta nga lindja e Libisë për ta sulmuar kryeqytetin në perëndim të vendit.

Ai është udhëheqës i Ushtrisë Çlirimtare Libiane, e cila e kontrollon pjesën më të madhe të shtetit. Megjithatë, gjashtë muaj më pas, Tripoli po i reziston sulmit të ushtarakut. Ai është bllokuar në periferinë jugore të qytetit.

Qeveria e njohur nga Kombet e Bashkuara po përballet me vështirësi për ta mbajtur pushtetin. Madje, ajo nuk po mund të sigurojë as rrymë dhe ujë të mjaftueshëm për popullatën, përfshirë edhe banorët e kryeqytetit.

Që nga viti 2011, pak gjëra kanë ndryshuar në Libi. Ende ka vullnetarë që e rrezikojnë jetën e tyre dhe ende ka pasiguri.

Ish-ministri britanik në Libi, Peter Millett, pret që një konferencë gjermane të merret me problemin e Libisë, por thotë se përparimi në praktikë mund të jetë ende shumë larg, shkruan “BBC”, transmeton Gazeta Express.