Turqia çon ambasador në Izrael pas 6 vjetësh

19:36 | 12 Dhjetor 2016
Trina Galanxhi

Ambasadori i parë turk i emëruar në Izrael prej vitit 2010 paraqiti sot letrat kredenciale presidentit izraelit, Reuven Rivlin pas gjashtë vitesh krizë diplomatike mes dy vendeve, sipas një deklarate.

“Ambasadori Mekin Okem u prit në Jeruzalem nga presidenti Rivlin, i cili mori shkas nga rasti në fjalë për t’i shprehur ngushëllimet e tij pas sulmit tragjik të regjistruar dy ditë më parë në Stamboll”, bëri të ditur një deklaratë e presidencës izraelite.

Presidenti vuri theksin tek shpresa e “një faqeje të re premtuese” të hapur në marrëdhëniet mes dy shteteve.

Presidenti turk, Recep Tayyip Erdogan mori javën e fundit letrat kredenciale të ambasadorit izraelit në Ankara, Eitan Naeh.

Mekin Okem është ambasadori i parë turk i emëruar në këtë post në Izrael prej sulmit të ndërmarrë në 2010 nga ana e komandove izraelite kundër një anije që kërkonte të thyente bllokadën në Rripin e Gazës. Dhjetë turq u vranë në këtë sulm.