Presidenti amerikan, Donald Trump ka publikuar në platformën e tij Truth Social një video hiperrealiste dhe të manipuluar me inteligjencë artificiale, e cila tregon ish-presidentin, Barack Obama duke u arrestuar nga agjentët e FBI-së në Zyrën Ovale.

Videoja, e publikuar më 20 korrik 2025 dhe e shoqëruar me mbishkrimin “Askush nuk është mbi ligjin”, nuk përmbante ndonjë paralajmërim që tregonte se ishte një prodhim i krijuar nga AI, duke shkaktuar reagime të ashpra.

Kritikët e cilësuan videon si shumë të papërgjegjshme, duke theksuar se ajo mund të përhapë dezinformim dhe të dobësojë besimin e publikut ndaj mediave në një periudhë tashmë të polarizuar.

Publikimi i kësaj videoje u bë në një kohë kur Drejtorja e Inteligjencës Kombëtare, Tulsi Gabbard, akuzoi në Fox News zyrtarët e administratës Obama për trillimin e narrativës së bashkëpunimit mes Trump dhe Rusisë pas zgjedhjeve të vitit 2016.

Gabbard pretendon se ka prova “tronditëse” dhe planifikon t’i dorëzojë ato Departamentit të Drejtësisë dhe FBI-së për hetime të mëtejshme.

Ndërkohë, as Obama dhe as stafi i tij nuk kanë dhënë ende ndonjë reagim lidhur me videojen AI, e cila ka shtuar tensionet dhe ka përçarë opinionet në rrjetet sociale.