Presidenti Donald Trump ka thënë se “nuk shqetësohet” nëse prodhuesit e makinave rrisin çmimet pasi tarifat e tij prej 25% për automjetet e prodhimit të huaj të hyjnë në fuqi.

Disa analistë kanë paralajmëruar se tarifat e importit të Trumpit mund të çojnë në mbylljen e përkohshme të disa prodhimeve të makinave në SHBA, shkruan BBC.

Por presidenti amerikan i tha NBC News të shtunën se ai shpresonte se prodhuesit e huaj të makinave do të rrisin çmimet pasi kjo do të thotë se “njerëzit do të blejnë makina të prodhuara në Amerikë”.

Të mërkurën, Trump njoftoi tarifat e reja prej 25% për makinat dhe pjesët e makinave që hyjnë në SHBA, që do të fillojnë më 2 prill. Tarifat për bizneset që importojnë automjete priten të hyjnë në fuqi më 3 prill dhe taksat për pjesët do të fillojnë në maj ose më vonë.