Derisa ish-administrata e presidentit Barack Obama i kishte ikur, Hëna për presidentin e ri është bërë një destinacion mjaft i dëshiruar dhe ai inkurajon iniciativën e sektorit privat në të cilin sheh potencial premtues.

Ndonëse, Donald Trump shumë pak ka folur për këtë publikisht, bashkëpunëtorët e tij dhe ish-punonjës të NASA-s të cilët e këshillojnë, flasin se ekziston interes për kthim në Hënë në kuadër të partneritetit me sektorin privat.

Miliarderi Elon Musk (Space X) dhe Jeff Bezos (Amazon) janë takuar disa herë me këshilltarët e Trump pas zgjedhjeve. “Sigurisht se ekziston interes i ri për Hënën në administratën e Trump”, ka thënë John Logsdon, ish-drejtor i Institutit për politika të kozmosit në Uashington. Disa nga këshilltarët e presidentit të ri kanë punuar në programin Constellation të ish-presidentit George W. Bush, i cili ka paraparë kthimin në Hënë si etapën e parë para misionit në Mars.

Megjithatë, Barack Obama, duke vlerësuar Constellation si tepër të shtrenjtë, hoqi dorë nga ky mision, me arsyetimin se SHBA-të kanë qenë tashmë në Hënë dhe se më tepër duhet koncentruar në planetin Mars.

Disa nga njerëzit e përfshirë në këtë mision ende janë të zemëruar, pasi vlerësojnë se vendimi për heqje dorë ishte i gabuar.

Të tjerët shpresojnë në projektin ambicioz të Trump, i cili do të përfshinte edhe partneritetin publiko-privat.

“Administrata e Trump dëshiron të bëjë diçka spektakulare dhe të guximshme, dhe Hëna është një ide e sigurt”, ka thënë Eric Stallmer, kryetar i Federatës për fluturime komerciale në gjithësi.