Zyrtarët e Tajvanit kanë zhvilluar bisedimet e tyre të para për tarifat me zyrtarët amerikanë të premten, duke shprehur gatishmërinë për diskutime të mëtejshme për të forcuar marrëdhëniet tregtare midis dy vendeve.

Tajvani, një prodhues kryesor çipesh, ka shprehur shqetësim për tarifat e vendosura prej 32% nga Shtetet e Bashkuara, duke i cilësuar ato si të padrejta. Megjithatë, qeveria e Tajvanit ka paraqitur propozime për një regjim pa tarifa, si dhe për të rritur blerjet dhe investimet në SHBA.

Në një deklaratë të lëshuar nga Zyra e Negociatave Tregtare të Tajvanit, u njoftua se zyrtarët e Tajvanit kanë zhvilluar një videokonferencë me zyrtarët amerikanë, por pa identifikuar ata. Bisedimet u përqendruan në tarifat reciproke, pengesat jotarifore për tregtinë, dhe çështje të tjera ekonomike, duke përfshirë kontrollin e eksporteve.

Të dy palët shprehën gatishmërinë për të vazhduar konsultimet dhe për të ndërtuar një marrëdhënie të qëndrueshme dhe të fortë tregtare midis dy vendeve.

Presidenti Donald Trump, vetëm disa ditë më parë, shpalli se do të ulë përkohësisht tarifat ndaj disa shteteve, ndërkohë që do të rrisë presionin ndaj Kinës.

Taiëani, i njohur si shtëpia e TSMC, prodhuesit më të madh të çipave kontraktues në botë, ka kërkuar prej kohësh një marrëveshje tregtare të lirë me SHBA-në, edhe pse dy shtetet nuk kanë marrëdhënie diplomatike formale.

Tajvani është gjithashtu nën presion të rritur nga Kina, që e sheh ishullin si pjesë të territorit të saj dhe ka rritur tensionet politike dhe ushtarake ndaj Tajvanit. Qeveria e Tajvanit ka refuzuar pretendimet e Kinës, duke theksuar se vetëm populli i Tajvanit ka të drejtën të vendosë për të ardhmen e tij./ abcnews.al