Një organizatë me origjinë shqiptare, që dyshohet se është kriminale është goditur nga Policia në Spanjë.

Në kuadër të operacionit të quajtur ‘SERVANA’, Garda Cilive arrestoi pesë persona në Valencia, në mesin e tyre edhe kreu i organizatës.

Gjithashtu u sekuestruan pothuajse 1 ton kanabis sativa – 308 kilogramë ishin në procesin e tharjes.

Në kontrollet e ndryshme janë sekuestruar edhe: në Xeresa (7 njësi industriale të klimatizimit, filtra karboni, ventilatorë, depozita, ndriçues etj., me vlerë 170 mijë euro), në Gandía (disa pajisje celulare, 2 mijë euro cash, një furgon dhe një makinë) dhe në Rótova (pajisje elektrike, kondicionerë industrialë, transformatorë të tensionit të mesëm dhe objekte portative të rritjes dhe tharjes së marijuanës, me një vlerë prej më shumë se 250 mijë euro).

Në total vlera e materialit të sekuestruar arrin në 420 mijë euro, raporton media e huaj Ondacero.es, transmeton KLankosova.tv.

Hetuesit konstatuan se ishte një organizatë me origjinë shqiptare, e strukturuar në mënyrë perfekte dhe me një metodologji kriminale të mirëpërcaktuar.

Autoriteti Gjyqësor urdhëroi masën arrest me burg për 3 nga të arrestuarit.

Ata kanë kombësi shqiptare dhe kubaneze dhe janë nga 29 deri në 43 vjeç. Po hetohen edhe dy persona të tjerë, një burrë dhe një grua, me kombësi spanjolle të moshës 57 dhe 43 vjeç.