Një senator republikan amerikan ka bllokuar rezolutën e ngjarjeve të vitit 1915 gjatë periudhës osmane, duke cituar angazhimet e vazhdueshme diplomatike midis Uashingtonit dhe Ankarasë, raporton Anadolu Agency (AA).

Senatori David Perdue ngriti kundërshtimin tij gjatë një thirrjeje për unanimitet që nevojitej për avancimin e rezolutës.

“Kjo administratë vazhdon angazhimin e saj me lidershipin e Turqisë pas takimit të presidentit Trump me presidentin Erdoğan. Në dritën e këtyre përpjekjeve diplomatike, me respekt kundërshtoj këtë rezolutë në këtë kohë”, tha Perdue.

Senatori Robert Menendez, bashkësponsori i rezolutës së bashku me senatorin republikan Ted Cruz, kërkuan pëlqimin për të miratuar rezolutën pasi senatori Lindsey Graham në mënyrë të ngjashme e bllokoi atë javën e kaluar.

Më 29 tetor, në përvjetorin e Republikës së Turqisë, Dhoma e Përfaqësuesve të SHBA-së votoi 405-11 në favor të një rezolute për të njohur ngjarjet me armenët gjatë kohës së Perandorisë Osmane në vitin 1915 si “gjenocid”. Rezoluta ligjërisht nuk është e detyrueshme.

Qëndrimi i Turqisë është se vdekja e armenëve në Anadollin lindor në vitin 1915 ndodhi kur disa morën anën me rusët pushtues dhe u rebeluan kundër forcave osmane. Një zhvendosje e mëvonshme e armenëve rezultoi në viktima të shumta.

Ankaraja nuk e pranon gjenocidin e pretenduar, por pranon se pati viktima nga të dyja palët gjatë ngjarjeve të Luftës së Parë Botërore.

Turqia kundërshton paraqitjen e incidenteve si “gjenocid”, por ngjarjet e vitit 1915 i përshkruan si një tragjedi për të dyja palët.