Presidenti Erdoğan zhvillon bisedë telefonike me homologun gjerman Steinmeier

23:44 | 14 Shtator 2021

Presidenti i Turqisë, Recep Tayyip Erdoğan, zhvilloi bisedë telefonike me homologun gjerman Frank-Walter Steinmeier, transmeton Anadolu Agency (AA).

Në bisedën telefonike Erdoğan-Steinmeier u diskutuan marrëdhëniet Turqi-Gjermani dhe temat rajonale, përfshirë çështjen e migrimit, njoftoi Drejtoria e Komunikimeve e Presidencës së Turqisë.

Erdoğan ka falënderuar presidentin gjerman Frank-Walter Steinmeier për fjalët e tij të mira për komunitetin turk në Gjermani dhe Turqinë në panelin e mbajtur të premten e kaluar me rastin e 60-vjetorit të Marrëveshjes së Punës Turqi-Gjermani.

Duke vënë në dukje se Turqia dhe Gjermania, si aleatë të NATO-s, shfaqën solidaritet dhe koordinim të admirueshëm gjatë procesit të evakuimit nga Afganistani, presidenti Erdoğan deklaroi se i njëjti mirëkuptim duhet të ruhet gjatë periudhës kritike që po kalon Afganistani.

Duke folur për çështjen e dërgimit të ndihmës së nevojshme humanitare në Afganistan nga OKB-ja dhe organizatat e tjera të ndihmës, Erdoğan ka thënë se askush nuk do të donte të përjetonte një përvojë të ngjashme me valën e refugjatëve sirianë të vitit 2015, dhe që në këtë drejtim, Gjermania dhe Bashkimi Evropian duhet të sigurojnë mbështetje për vendet fqinje që mbajnë barrën e migrimit nga Afganistani.

Ai ka theksuar se disa vende evropiane e kanë reduktuar çështjen vetëm në sigurinë kufitare, duke shtuar se Turqia nuk ka kapacitet për të përballuar një barrë të re migrimi.

Erdoğan po ashtu ka treguar pritshmërinë e ligjshme të Turqisë për zbatimin e Marrëveshjes së 18 Marsit me të gjitha dimensionet e saj, duke vënë në dukje se Bashkimi Evropian duhet të ndërmarrë hapa të shpejtë për çështje si rifillimi i negociatave të pranimit, azhurnimi i Bashkimit Doganor dhe liberalizimi i vizave për qytetarët turq.

Shpërndaje në rrjete sociale

Lajmet më të lexuara