Një agjent i forcave patrulluese kufitare është arrestuar në shtetin e Teksasit, pas dyshimeve për vrasjen e 4 femrave. Oficerët nisën kërkimet për Juan David Ortiz në qytetin e Laredos, pasi një femër tjetër pretendon t’i ketë shpëtuar atij dhe të ketë kërkuar ndihmë nga policia lokale.

Ortiz, i cili ka punuar prej gati një dekadë për forcat kufitare, fillimisht u arratis, por më pas u arrestua në një vendparkimi të një hoteli. Emrat e 4 viktimave nuk janë zbuluar ende, por policia njofton se ato ishin punonjëse seksi.

Sherifi i kantonit Webb, Martin Cuellar tha se policia beson që Ortiz të ketë vepruar i vetëm e të mos ketë bashkëpunëtorë në krim. “I tërë kantoni, por edhe qyteti ynë mund të jetë i qetë tashmë, pasi ne e kemi kapur vrasësin serial”, tha Cuellar.

Dy prej viktimave të tij u gjetën në fillim të muajit në një zonë rurale pranë një autostrade, ndërsa dy të tjerat u gjetën në të njëjtën zonë gjatë ditëve të fundit, sipas raportimeve lokale. Një grua 42-vjeçare u gjet e plagosur të enjten, por ndërroi jetë në spital.

Prokurori i qarkut, Isidro Alaniz i përshkroi vrasjet si një “rast tmerrues”, teksa konfirmoi se Ortiz do të përballet tashmë me 4 akuza për vrasje dhe një për pengë marrje. Sipas tij, shkaku i vdekjeve të të 4 grave ishin të ngjashme, pasi ato punonin si punonjëse seksi, por hetuesit po punojnë ende për të zbuluar motivet e vrasjeve. Dy prej viktimave ishin shtetase amerikane, ndërsa njëra prej grave ishte trans seksuale.