Një përmbytje e përmasave rekord ka goditur Australinë Lindore, duke shkaktuar pasoja të rënda për jetën e qytetarëve dhe infrastrukturën vendore. Si pasojë e motit ekstrem, deri më tani janë konfirmuar të paktën tre viktima, ndërsa një person rezulton ende i zhdukur, raportoi agjencia ndërkombëtare Reuters.

Sipas autoriteteve australiane, mbi 23 mijë shtëpi janë përmbytur, duke shkaktuar dëme të mëdha materiale dhe duke detyruar mbi 48,800 banorë të izolohen, pa mundësi për t’u larguar apo për të marrë ndihma të menjëhershme.

Situata në terren mbetet kritike dhe në zhvillim të vazhdueshëm. Ekipet e shpëtimit po punojnë pa ndërprerje për të evakuuar banorët e bllokuar. Operacionet po kryhen me mjete të specializuara, përfshirë helikopterë, varka shpëtimi dhe dronë për identifikimin e zonave më të rrezikuara.

Shumë persona janë detyruar të ngjiten mbi çatitë e shtëpive për të shmangur përmbytjen, ndërsa autoritetet bëjnë thirrje për durim dhe bashkëpunim me ekipet e emergjencës.