Dhjetëra delegatë nga vende të ndryshme anëtare të Kombeve të Bashkuara, përfshirë Iranin, braktisën sallën e Asamblesë së Përgjithshme të OKB-së të premten, në shenjë proteste ndaj fjalimit të Kryeministrit të Izraelit, Benjamin Netanyahu.

Netanyahu, i cili pritej të mbronte veprimet ushtarake të Izraelit në Rripin e Gazës, nisi fjalimin mes tensioneve të larta diplomatike, ndërsa delegatët dilnin njëri pas tjetrit nga salla.

Në një deklaratë të fortë, Netanyahu kritikoi njohjen perëndimore të një shteti palestinez, duke e konsideruar atë një mesazh të rrezikshëm:

“Njohja perëndimore e Palestinës tregon se ‘vrasja e hebrenjve ia vlen’”, tha ai, duke akuzuar disa vende për legjitimizim të terrorizmit, shkruan DailyMail.

Duke iu drejtuar udhëheqësve të vendeve perëndimore, Netanyahu paralajmëroi:

“Ata që frikësohen përballë së keqes, nuk do t’i shpëtojnë stuhisë së xhihadit duke sakrifikuar Izraelin.”

Kryeministri izraelit gjithashtu njoftoi se fjalimi i tij po transmetohej drejtpërdrejt në Rripin e Gazës përmes altoparlantëve të mëdhenj të vendosur përgjatë kufirit.

Fjalimi i tij vjen pak ditë pasi disa shtete – përfshirë Australinë, Kanadanë, Francën dhe Mbretërinë e Bashkuar – njoftuan njohjen e një shteti të pavarur palestinez, një veprim që Tel Avivi e ka kundërshtuar ashpër.