Presidenti i Shteteve të Bashkuara, Donald Trump, është nominuar për Çmimin Nobel për Paqen nga qeveria pakistaneze, për rolin e tij në zbutjen e tensioneve midis Pakistanit dhe Indisë, gjatë një krize që kërcënonte të përshkallëzohej në konflikt të armatosur.

Në një deklaratë zyrtare të postuar në rrjetin social X (ish-Twitter), autoritetet pakistaneze thanë:

“Në një kohë trazirash të shtuara rajonale, Donald Trump demonstroi largpamësi strategjike dhe aftësi të jashtëzakonshme politike përmes angazhimit diplomatik me Islamabadin dhe Nju Delhin. Ky ndërmjetësim ndihmoi në çtensionimin e një situate që po përkeqësohej me shpejtësi, duke siguruar një armëpushim dhe duke parandaluar një konflikt më të gjerë midis dy shteteve të armatosura me armë bërthamore.”

Deklarata e përshkruan këtë ndërhyrje si dëshmi të rolit të Trump-it si “paqebërës i vërtetë” dhe të përkushtimit të tij për zgjidhjen e krizave përmes dialogut.

Nga ana tjetër, Trump, duke folur me gazetarët në Morristown, New Jersey, komentoi në mënyrë ironike për këtë çështje, duke thënë:

“Unë do të duhej ta kisha marrë Çmimin Nobel për Paqen 4 apo 5 herë deri më tani. Por ata ua japin vetëm liberalëve.”

Kjo nuk është hera e parë që Trump përmendet si kandidat për Nobel; ai ka marrë më parë nominime për përpjekjet e tij në proceset e paqes në Lindjen e Mesme dhe në Gadishullin Korean.