Varianti i ri i Omicron, i njohur si BA.2 është gjetur në pesë vende afrikane, ka deklaruar OBSH, duke shtuar se shkencëtarët janë të shqetësuar për këtë variant sepse është i vështirë për t’u identifikuar.

Nënvarianti BA.2 ka filluar të zëvendësojë variantin BA.1 të Omicronit, që mbizotëronte në disa vende, transmeton portal arbresh.info

Të dhënat e deritanishme nuk tregojnë dallime në ashpërsinë e sëmundjeve të shkaktuara nga varianti “i vjetër” dhe ai i ri, njoftoi OBSH.

“Nën-varianti BA.2 është gjetur në Botsvana, Kenia, Malavi, Senegal dhe Afrikën e Jugut,” tha Dr Nicksy Gumede-Moeletsi në një konferencë për shtyp në internet.

Gumede-Moeletsi tha se ata ishin “shumë të shqetësuar” sepse nënvarianti BA.2 ishte i vështirë për t’u identifikuar nga metodat e përdorura deri më tani për të dalluar origjinalin nga nënvariantet e tjera të Omicron.

OBSH është duke punuar intensivisht me laboratorët shkencorë, në mënyrë që të përfitojnë një pasqyrë më të detajuar mbi përhapjen e këtij varianti./arbresh.info/