Rreth 1.900 kufoma janë nxjerrë nga rrënojat në qytetin verior të Mosulit në Irak, pas konfliktit trevjeçar (2014-2017) me grupin terrorist DEASH, raporton Anadolu Agency (AA).

“Ekipet e Mbrojtjes Civile deri tani kanë nxjerrë rreth 1.900 kufoma të gjetura nën rrënojat e ndërtesave të shkatërruara në qarkun e Qytetit të Vjetër të Mosulit”, tha për AA Fahed al-Abed, një zyrtar i Mbrojtjes Civile në provincën e Ninevës në Irak (ku Mosuli është kryeqyteti provincial).

Në muajin maj, Drejtoria e Mbrojtjes Civile e Ninevës filloi të pastrojë rrënojat e Mosulit, dikur kështjellë e DEASH-it, në një përpjekje për të gjetur trupat e civilëve dhe të luftëtarëve të vrarë të DEASH-it.

Sipas Al-Abed, shumica e trupave të rigjetur janë ato të militantëve të paidentifikuar.

“Ka gjithashtu shumë trupa të grave dhe fëmijëve që besohet të kenë qenë familjet e anëtarëve të DEASH-it”, shtoi ai, pa shpjeguar se si ka arritur deri te ky supozim.

Sipas raportimeve të ndryshme të mediave, nga sulmet e ashpra ajrore të kryera nga koalicioni i udhëhequr nga SHBA-të në vitin 2014 për të luftuar grupin terrorist, mijëra civilë u vranë në Mosul gjatë konfliktit me DEASH-in.