Ministri i Punëve të Jashtme i Pakistanit, Shah Mahmood Qureshi, ka rezultuar pozitiv në testin e koronavirusit të ri (COVID-19), transmeton Anadolu Agency (AA).

“Këtë pasdite ndjeva një temperaturë të lehtë dhe menjëherë u karantinova në shtëpi. Tani kam rezultuar pozitiv me COVID-19. Falë mirësisë së Allahut, ndihem i fortë dhe energjik”, shkroi në twitter Qureshi.

Ai tha se do të vazhdojë të kryejë detyrat e tij nga shtëpia dhe i bëri thirrje popullatës që të luten për të.

Më herët, edhe dy ish-kryeministrat pakistanez, Shahid Khaqan Abbasi dhe Syed Yousaf Raza Gilani, lideri opozitar Shehbaz Sharif, si dhe disa anëtarë të kabinetit, ligjvënës dhe politikanë kanë rezultuar pozitiv me COVID-19. Shumica prej tyre janë shëruar.

Me 4.087 raste të reja gjatë 24 orëve të kaluara, numri i përgjithshëm i rasteve me koronavirus në vend ka arritur në 221.896.

Nga Ministria e Shëndetësisë së Pakistanit thonë se mbi 50 për qind e pacientëve janë shëruar deri më tani, ndërsa 4.551 kanë humbur jetën për shkak të virusit.