Disa liderë botërorë bënë thirrje të dielën për bisedime diplomatike me qëllim uljen e tensioneve mes Izraelit dhe Iranit.

Presidentja e Komisionit Evropian, Ursula von der Leyen, riafirmoi përkushtimin e Evropës ndaj “paqes, stabilitetit dhe përpjekjeve diplomatike që çojnë drejt de-përshkallëzimit”, pas një bisede me kryeministrin izraelit, Benjamin Netanyahu.

Von der Leyen shprehu gjithashtu shqetësimin për zhvillimin e programit bërthamor të Iranit.

“Evropa ka qenë gjithmonë e qartë: Irani nuk duhet të ketë kurrë një armë bërthamore. Ka një nevojë urgjente për një zgjidhje të negociuar,” tha ajo.

Presidenti turk Recep Tayyip Erdogan mirëpriti thirrjen e presidentit amerikan Donald Trump që Izraeli dhe Irani të arrijnë një marrëveshje, raportoi agjencia shtetërore turke Anadolu.

Sipas Anadolu, Erdogan gjithashtu theksoi “dëmet ekonomike dhe civile të pakthyeshme” për të dyja palët dhe nënvizoi nevojën për de-përshkallëzim.