Rezultatet e zgjedhjeve për kreun e ri të Partisë Konservatore Britanike, i cili do të marrë postin e kryeministrit të Mbretërisë së Bashkuar, do të shpallen të hënën në orën 12:30 me kohën tonë, njoftoi sot agjencia Reuters.

Ministrja e Jashtme Liz Truss dhe ish-ministri i Financave Rishi Sunak luftuan për postin drejtues në zgjedhjet e brendshme partiake, transmeton portal arbresh.info

Reuters kujtoi se sondazhet e fundit të opinionit publik treguan se Truss ka më shumë mbështetje se Sunak dhe se, sipas të gjitha llogarive, ajo do të bëhet kryeministre e Britanisë së Madhe.

Boris Johnson dha dorëheqje nga pozita e kryeministrit me 7 korrik të këtij viti dhe në një fjalim publik me atë rast tha se ishte e qartë se kjo ishte dëshira e Partisë së tij Konservatore.

Johnson ka thënë se do të mbetet kryeministër derisa të emërohet një pasardhës, pavarësisht thirrjeve që ai të hiqet nga detyra sa më shpejt të jetë e mundur.

Përpara se Johnson të shpallte dorëheqjen e tij, rreth 50 ministra dhe zyrtarë të shquar qeveritarë u larguan nga kabineti i tij për shkak të një numri të madh të skandaleve./arbresh.info/