Të gjithë fajtorët për vrasjen e ambasadorit rus në Turqi, Andrej Karlov do ta marrin dënimin e merituar, shkroi sot kryeministri turk, Binali Jilldirim në një libër zie në Ambasadën e Rusisë në Ankara.

“Ata të cilët me këtë vrasje makabre deshën t’i dëmtojnë marrëdhëniet e tona të mira dhe t’i rrënojnë urat midis popujve tanë, nuk do ta arrijnë qëllimin e tyre. Të gjithë fajtorët, një nga një, do të zbulohen dhe do ta marrin dënimin e merituar”, shkroi Jilldirim në librin e zisë të hapur me rastin e vrasjes së ambasadorit Karlov.

Siç njofton TAS, Jilldirim theksoi se Karlov ka dhënë kontribut të madh për zhvillimin e marrëdhënieve turke me Rusinë dhe është “bërë simbol i përjetshëm i miqësisë turke”.

“Dhembja jonë është e thellë. Por, vendosmëria jonë për t’i zhvilluar marrëdhëniet në bazë të interesave të përbashkëta dhe pritjet e popujve tanë është përforcuar akoma më shumë. Në emrin tim dhe në emër të Qeverisë dhe kombit, shpreh ngushëllimet më të sinqerta për familjen e Karlov, te të afërmit e tij dhe deri te populli rus dhe Qeveria”, shkroi Jilldirim.

Ambasadori turk Karlov u vra të hënën nga polici turk, Mevlut Mert Altantash gjatë hapjes së ekspozitës së fotografive “Rusia në sytë e turqve” në Qendrën për art bashkëkohor në Ankara.