Autoriteti më i lartë i Iranit, Ayatollah Ali Khamenei tha të martën se Teherani nuk ishte përfshirë në sulmin e fundjavës së grupit Hamas ndaj Izraelit, por ai përshëndeti atë që ai e quajti humbjen ushtarake dhe të inteligjencës “të pariparueshme” të Izraelit.

Në fjalimin e tij të parë televiziv që nga sulmi, Khamenei tha “ne puthim duart e atyre që planifikuan sulmin ndaj regjimit sionist”.

“Ky tërmet shkatërrues ka shkatërruar disa struktura kritike (në Izrael) të cilat nuk do të riparohen lehtë… Veprimet e regjimit sionist janë fajtorë për këtë fatkeqësi”, tha Khamenei.

Irani ka mbështetur prej kohësh grupin Hamas, i cili kontrollon Rripin e Gazës dhe refuzon të drejtën e Izraelit për të ekzistuar.

Izraeli tha më herët të martën se kishte rivendosur kontrollin mbi kufirin e Gazës dhe se po vendoste mina ku militantët kishin rrëzuar pengesën gjatë sulmit të tyre të përgjakshëm të fundjavës, pas një nate tjetër sulmesh ajrore të pamëshirshme izraelite në enklavë.

Shtetet e Bashkuara thanë të hënën se Irani ishte bashkëpunëtor në sulmin e Hamasit ndaj Izraelit, megjithëse tha se nuk kishte inteligjencë apo prova që tregonin pjesëmarrjen e drejtpërdrejtë të Teheranit./euronews.al