I dërguari special i SHBA mbërrin në Kiev, në fokus siguria dhe ndihma ushtarake

12:01 | 14 Korrik 2025
Gita

I dërguari special i SHBA-së, Keith Kellogg, mbërriti të hënën e kësaj jave në Kiev, ku do të zhvillojë bisedime me zyrtarë të lartë ukrainas mbi çështjet e sigurisë dhe sanksionet kundër Rusisë. Lajmi u konfirmua nga këshilltari kryesor i Presidentit ukrainas, Andriy Yermak.

Vizita e Kellogg vjen pas njoftimit të Presidentit të SHBA-së, Donald Trump, për dërgimin e sistemeve të mbrojtjes ajrore ‘Patriot’ në Ukrainë.

“Ne e mirëpresim ngrohtësisht të dërguarin special të SHBA-së në Ukrainë. Paqja përmes forcës është parimi i Presidentit Trump dhe ne e mbështesim këtë qasje”, tha Yermak.

Ai shtoi se në qendër të diskutimeve janë mbrojtja, armët, siguria, sanksionet dhe bashkëpunimi mes dy vendeve./euronews/