Qeveria hungareze ka deklaruar se do të dorëzojë një projektligj kundër migracionit në parlament, i quajtur “Stop Soros”, duke synuar në këtë formë edhe grupet qytetare që organizojnë, mbështesin dhe financojnë migracionin.

Masat propozojnë që grupet e tilla duhet të marrin leje nga Ministria e Brendshme për ndonjë aktivitet, transmeton portali arbresh.info

Kryeministri i Hungarisë, Victor Orban, i cili kundërshton migracionin, pretendon se grupet që po e kryejnë atë janë pjesë e filantropit George Soros.

Bence Tuzson, sekretari shtetëror për komunikimet qeveritare, tha të martën se krahasuar me një version të mëparshëm, projektligji është bërë edhe më i rreptë bazuar në mbi 600 sugjerime nga qytetarët.

Kritikët druajnë se ligji do të përdoret për të stigmatizuar ose frikësuar grupet qytetare, veçanërisht ata që marrin fonde nga jashtë./arbresh.info/