Kryeministri i Sllovenisë, Robert Golob, në fund të samitit të NATO-s në Uashington, të enjten tha se vendi i tij do ta dyfishojë prezencën e tij në KFOR.

Ai sqaroi se prezenca e Aleancës në Ballkanin Perëndimor po shtohet me iniciativë të presidentit Joe Biden, “i cili e njeh rajonin mirë”.

“Çdo shtet anëtar i Aleancës është i rëndësishëm kur kontribuon në më të mirën e saj. Sllovenia sigurisht ka vendin e saj si një anëtar shumë i rëndësishëm i NATO-s në Ballkanin Perëndimor”, tha Golob, duke shtuar se Sllovenia po dërgon trupa shtesë për të parandaluar konflikte të reja në rajonin tradicionalisht të turbullt, raporton portali slloven i lajmeve “siol”, transmeton Klankosova.tv.

Në KFOR aktualisht shërbejnë rreth 110 pjesëtarë të Forcave të Armatosura Sllovene.

Sipas Golob, samiti tre-ditor i NATO-s në Uashington ishte më i suksesshëm se sa pritej. Sipas tij, Ukraina në veçanti mund të jetë e kënaqur. “Ka pasur një materializim të marrëdhënieve afatgjata midis aleancës dhe Ukrainës, e cila do të ndihmojë për t’i dhënë fund luftës në Ukrainë më shpejt. Unë jam i sigurt për këtë”, tha ai.

Angazhimet për të vazhduar për të ndihmuar Ukrainën janë gjithashtu sinjali më i mirë për Rusinë se ajo duhet të llogarisë në mbështetjen afatgjatë të Perëndimit për Ukrainën, tha Golob. “Është koha që Rusia të kuptojë nevojën për të filluar bisedimet e paqes”, tha kryeministri slloven, Robert Golob.