Pakistanezja Malala Wousafzai, e vlerësuar me cmimin Nobel për paqen në 2014, do të ndjekë studimet në universitetin e Oksfordit, ku do të studiojë piolitikë, filozofi dhe ekonomi. Vetë vajza e ka bërë të ditur këtë me një mesazh në rrjetet sociale.

Pesë vite më parë, kur ishte vetëm 15 vjeç, ajo u plagos rëndë në kokë në një atentat të kryer kundër saj nga talebanët dhe u transferua në Britaninë e Madhe për t’iu nënshtruar atje trajtimit mjekësor.

Pas këtij episodi, historia e saj u rrëfye në të gjithë botën, duke i dhënë asaj përveç çmimit Nobel, edhe çmimin Sacharov për lirinë e shprehjes që çdo vit ndahet nga Parlamenti Evropian.

Prillin e kaluar u emërua nga OKB edhe ambasadore e paqes ndërkohë që pakistanezja e re bashkë me të atin, drejtojnë një fondacion për promovimin e të drejtës për arsimim.

Tani, ajo iu bashkua mijëra studentëve të tjerë në Britani, që zbuluan se në cilin universitet do të ndjekin studimet pas rezultateve përfundimtare të tyre.