Ministri i Punëve të Jashtme gjermane, Frank-Walter Steinmeier, kritikoi të premten në mënyrë implicite në Madrid projektin e separatistëve në Kataluni, të cilët aspirojnë të ndahen nga Spanja, duke u shprehur se Evropa nuk ka domosdoshmëri për kufij të rinj.

“Si evropianë, unë mendoj se nuk na duhen kufij të rinj në Evropë” u shpreh ministri. “Urimi ynë si evropianë është që kontinenti të orientohet drejt një bashkimi më të qëndrueshëm dhe që kufijtë të jenë gjithmonë e më pak të rëndësishëm”.

Ai kishte diskutuar më parë me homologun spanjoll, José Manuel García-Margallo rreth suksesit të separatistëve në zgjedhjet rajonale të 27 shtatorit në Kataluni, rajon në verilindje të Spanjës, transmeton gazeta Zëri/

Separatistët të cilët janë angazhuar në nisjen e një procesi të shkëputjes kanë siguruar një shumicë absolute të deputetëve në Parlamentin rajonal por nuk kanë mundur të fitojnë veçse 47,74 për qind të votave.