Presidenti i SHBA-së Donald Trump deklaroi se pushteti i tij është i kufizuar vetëm nga “morali” i tij, duke lënë mënjanë ligjin ndërkombëtar dhe kufizime të tjera në aftësinë e tij për të përdorur forcën ushtarake për të goditur, pushtuar ose detyruar shtetet të ndjekin urdhrat e tij në të gjithë botën.

I pyetur në një intervistë të gjatë me New York Times nëse ka kufizime në fuqitë e tij në nivel ndërkombëtar, Trump u përgjigj: “Po, ka një gjë. Morali im. Mendja ime. Është e vetmja gjë që mund të më ndalojë. Nuk kam nevojë për ligjin ndërkombëtar”, shtoi ai. “Nuk dua t’i lëndoj njerëzit.”

Kur u pyet përsëri nga NYT nëse qeveria e tij duhet të zbatojë të drejtën ndërkombëtare, Trump u përgjigj se po, duke theksuar megjithatë se ai vetë do të jetë ai që do të gjykojë se kur këto kufizime do të zbatohen për Shtetet e Bashkuara.

“Varet se si e përcaktoni të Drejtën Ndërkombëtare”, u përgjigj ai në mënyrë karakteristike.

Vlerësimi i Trumpit për lirinë e tij për të përdorur çdo mjet të pushtetit ushtarak, ekonomik apo politik për të konsoliduar supremacinë amerikane ishte “pranimi më i drejtpërdrejtë i botëkuptimit të tij deri më sot”, komentoi New York Times.

Në të njëjtën intervistë, ai pranoi disa kufizime në vend, “pavarësisht se ndjek një strategji maksimaliste të ndëshkimit të institucioneve që nuk i pëlqejnë, një logjikë hakmarrjeje ndaj kundërshtarëve politikë dhe vendosjen e Gardës Kombëtare në qytete pavarësisht kundërshtimeve të autoriteteve shtetërore dhe lokale”.

Trump ka theksuar se përdor reputacionin e tij si një udhëheqës i paparashikueshëm dhe gatishmërinë e tij për t’iu drejtuar shpejt veprimeve ushtarake, shpesh për të ushtruar presion mbi kombet e tjera. Gjatë intervistës në Times, ai mori një telefonatë nga Presidenti kolumbian Gustavo Petro, i cili ishte dukshëm i shqetësuar pas kërcënimeve të përsëritura se Trump po shqyrtonte një sulm në stilin e Venezuelës ndaj vendit të tij.