Policia ka hedh ujë me presion dhe gaz lotsjellës kundër protestuesve në kryeqytetin e Gjeorgjisë, Tbilisi, në natën e dytë të trazirave.

Turmat janë të revoltuar pas mbështetjes së një ligji kontrovers të “stilit rus” nga parlamenti i vendit, që do t’i klasifikonte grupet joqeveritare dhe mediatike si “agjentë të huaj” nëse ata marrin më shumë se 20% të fondeve të tyre nga jashtë.

Të mërkurën në mbrëmje, policia shtyu protestuesit që rrëzuan një barrierë metalike jashtë parlamentit. Turmat u urdhëruan të shpërndaheshin dhe disa persona raportohet të jenë plagosur.

Pamjet e shpërndara në mediat vendase tregojnë qindra policë të pranishëm në rrugët e qytetit të mërkurën vonë në mbrëmje, të veshur me helmeta dhe me mburoja. Të paktën një makinë policie ishte përmbysur.

Retë e gazit lotsjellës u ngritën mbi rrugët përreth ndërtesës së parlamentit ndërsa policia u përpoq të shpërndante protestuesit.

Dhjetëra mijëra njerëz iu bashkuan ditës së dytë të protestave në vend. Një ligj i ngjashëm në Rusi është përdorur për të kufizuar ashpër lirinë e shtypit dhe për të shtypur shoqërinë civile.

“Ne mendojmë se qeveria jonë është nën ndikimin rus dhe kjo është shumë gjë e keqe për të ardhmen tonë,” tha Lizzie, një nga shumë studentë që marrin pjesë në protestë.

Protestuesit janë të shqetësuar po ashtu se, nëse ligji miratohet, do të dëmtojë shpresat e vendit për t’u bashkuar me BE-në./A2