Një zyrtar ukrainas ka dhënë detaje të mëtejshme rreth përleshjeve të para midis trupave ukrainase dhe koreano-veriore në rajonin Kursk të Rusisë, ku Ukraina nisi një kundërofensivë ndërkufitare në gusht.

Andrii Kovalenko, kreu i Qendrës së Ukrainës Kundër Dezinformimit, tha se “trupat e para të Koresë së Veriut tashmë janë sulmuar në rajonin e Kurskut”.

Kjo u konfirmua më vonë nga ministri i Mbrojtjes i Ukrainës, Rustem Umerov, i cili e quajti atë një “angazhim të vogël”.

Rustem tha se përleshja sinjalizoi me vendosmëri se Koreja e Veriut i ishte bashkuar konfliktit, shkruan yahoonews, përcjell Telegrafi.

“Ishte një angazhim i zakonshëm luftarak në rajonin e Kurskut”, tha Kovalenko, duke përshkruar se si forcat ukrainase kryejnë zbulim, identifikojnë pozicionet e armikut dhe nisin sulmet.

Ai tha se forcat ukrainase e dinin se trupat e Koresë së Veriut të veshur me uniforma ruse ishin shpërndarë nëpër njësi të ndryshme të ushtrisë ruse në rajon.

“Një sulm artilerie u nis kundër një pozicioni ku ndodheshin rusët dhe personeli ushtarak i Koresë së Veriut”, tha Kovalenko, duke shtuar se nuk ishte një incident i izoluar.

Gjithashtu, ai njoftoi se “betejat e përditshme” po ndodhin tani në zonën përreth Sudzha, një qytet i kontrolluar nga Ukraina.

“Sigurisht, granatimet e pozicioneve ndodhin çdo ditë”, tha ai.

Ndryshe, presidenti ukrainas Volodymyr Zelensky tha se ushtarët e Koresë së Veriut – të cilët Ukraina thotë se janë 11,000 – kishin pësuar tashmë humbje në Kursk.

Në javët e fundit, inteligjenca ukrainase ka ndarë detaje të pajisjeve ushtarake që thotë se Rusia u ka ofruar trupave të Koresë së Veriut, duke përfshirë mortaja, pushkë, mitralozë dhe raketa antitank. /Telegrafi/