Danimarka gati të japë mbi 100 milionë dollarë për të ndihmuar Ukrainën

08:29 | 20 Gusht 2024
R J

Qeveria dhe parlamenti danez kanë propozuar ndarjen e afërsisht 783 milionë kronave daneze (rreth 115.8 milionë dollarë) për blerjen e armëve për Ukrainën. Paketa e ndihmës ushtarake e Danimarkës, që thuhet se është e 20-ta, do të ndihmojë “për të përmbushur nevojat ushtarake të Ukrainës në afat të shkurtër dhe afatgjatë”

Paketa përfshin dispozita për prokurimin e pajisjeve të reja ushtarake nga industria e mbrojtjes ukrainase dhe daneze, si dhe rritje të ndihmës nga aleatët e huaj. Fondet për këtë iniciativë do të ndahen këtë vit.

“Për arsye operacionale dhe të sigurisë, ne nuk mund të detajojmë përmbajtjen e plotë të paketës së ndihmës”, tha Ministria daneze e Mbrojtjes. Sipas deklaratës, financimi duhet të miratohet ende nga komiteti i financave i parlamentit danez.

Danimarka ka premtuar 64.8 miliardë krona daneze (rreth 9.5 miliardë dollarë amerikanë) në mbështetje ushtarake për Ukrainën midis 2023 dhe 2028, e cila shpërndahet përmes Fondit të saj të veçantë të Ukrainës.

Një total prej 46.1 miliardë krona daneze (rreth 6.8 miliardë dollarë) tashmë janë shpenzuar ose premtuar.

Në prill, zyrtarët danezë ranë dakord të ndajnë një shtesë prej 4,4 miliardë krona daneze (rreth 650 milionë dollarë amerikanë) për mbështetje ushtarake për Ukrainën deri në vitin 2024.

Danimarka gjithashtu i përket koalicionit të aeroplanëve luftarakë dhe ka ofruar trajnime për F-16 për ekuipazhet ukrainase.