Britania e Madhe me siguri se do të braktisë edhe shërbimin evropian të policisë Europol, pas daljes nga Bashkimi Evropian.

Britania mund të mbajë për vete informacionet e saja, nëse në të ardhmen nuk arrin marrëveshje për siguri me Unionin, tha të mërkurën ministrja e Punëve të Brendshme, Ember Rad.

“Marrëveshja është në interesin e të dyja palëve dhe siguria nuk është çështje për të cilën do të tregtohet”, ka porositur Rad, transmeton Reuters.

Britania e Madhe është njëra nga tre përdoruesit më të mëdhenj të informacioneve të Europolit, derisa shtetet evropiane po ashtu kanë dobi nga informatat e Britanisë së Madhe.

Zyrtarë të sigurisë britanike dhe shefat e policisë më herët kanë tërhequr vërejtjen nga rreziku i daljes së vendit nga Europoli dhe braktisjes së marrëveshjes për urdhrat evropianë për arrestime, me të cilët nga të gjitha qeveritë BE-ja kërkon arrestimin e të dyshuarve për të cilët ka nisur hetime ndonjëra nga vendet anëtare të këtij blloku, përkujton Reuters.