Misioni `Artemis II; pritet të shënojë rikthimin historik të njerëzimit drejt Hënës, mbi pesë dekada pas misionit të fundit të programit Apollo.

Më 16 dhjetor 1972, në orën 23:35 UTC, moduli komandues “America” i misionit Apollo 17 përfundoi me sukses manovrën e kthimit drejt Tokës, duke shënuar herën e fundit që astronautët e NASA ndodheshin në orbitë rreth Hënës. Që nga ajo kohë, asnjë mision i drejtuar nga njerëz nuk ka udhëtuar më drejt saj, raporton NASA.

Tani, pas 52 vjetësh, 3 muajsh dhe 16 ditësh, njerëzimi është gati të rikthehet sërish në afërsi të Hënës.

Misioni Artemis II, i pari mision i drejtuar me ekuipazh në kuadër të programit Artemis, është planifikuar të lëshohet të mërkurën, më 1 prill, në orën 22:24 UTC (18:24 sipas kohës lokale në SHBA), nga kompleksi i lëshimit 39B në Qendrën Hapësinore Kennedy në Florida.

Anija kozmike Orion (CM-003), e pagëzuar “Integrity” nga ekuipazhi prej katër personash, do të ngrihet në hapësirë mbi raketën Space Launch System, duke ndjekur një trajektore lindore nga Florida.

Fillimisht, Artemis II do të vendoset në një orbitë të lartë rreth Tokës për të kryer kontrolle të sistemeve. Më pas, do të realizojë manovrën e injektimit translunar (TLI), e cila do ta dërgojë anijen drejt Hënës.

Ky mision konsiderohet një hap i madh drejt rikthimit të astronautëve në sipërfaqen e Hënës në vitet e ardhshme dhe një fazë kyçe në përgatitjet për eksplorime më të thella në hapësirë.