Me 78 vdekje të regjistruara gjatë 24 orëve të fundit nga koronavirusi në Iran, numri i përgjithshëm i viktimave ka shkuar në 60.431.

Zëdhënësja e Ministrisë së Shëndetësisë së Iranit, Sima Sadat Lari tha se në 24 orët e fundit janë shënuar 8.404 raste të reja me COVID-19, prej të cilëve 709 janë shtruar në spital, duke e çuar numrin e përgjithshëm të rasteve në 1.665.103.

Lari theksoi se 3.760 pacientë të prekur me COVID-19 po trajtohen në njësitë e kujdesit intensiv dhe shtoi se numri i të shëruarve që nga fillimi i pandemisë ka arritur në 1.420.958.

Ajo informoi se deri më tani në vendin me një popullsi prej rreth 83 milionë banorësh janë kryer 11.092.900 teste për COVID-19.

Zëdhënësja tha se sipas situatave të rrezikut në vend 11 qyteza janë të përfshira në mesin e rajoneve me alarm të “kuq” dhe 32 qyteza si zona “portokalli”, 251 qyteza si zona të “verdha” dhe 154 qyteza si zona “blu”.