Ministrja e Arsimit, Arbërie Nagavci ka bërë të ditur se kanë buxhetuar pagat për punësimin e 500 asistentëve për fëmijët me nevoja të veçanta.

Me anë të një postimi në Facebook, Nagavci theksoi se është ofruar edhe mundësia për kualifikimin e atyre që kanë interes për t’u punësuar si asistent, përcjell Arbresh.info.

“Një nga premtimet tona që po e përmbushim kanë qenë asistentët për fëmijët me nevoja të veçanta. Si Ministri kemi buxhetuar pagat për punësimin e 500 asistentëve. Krahas kësaj kemi ofruar edhe mundësinë për kualifikimin e atyre që kanë interes për t’u punësuar si asistent. Në linjë me këtë kemi hapur sot konkursin për regjistrimin e kandidatëve të gjeneratës së shtatë për nivelin e V-të, të kualifikimit “Asistent për fëmijë/nxënës me nevoja të veçanta arsimore””, ka shkruar Nagavci.

“Këtë vit shkollor, kualifikimi do të ofrohet në 8 grupe, prej tyre 3 grupe në Prishtinë dhe nga një grup në Ferizaj, Gjilan, Prizren, Gjakovë dhe Mitrovicë. Të gjithë kandidatët të cilët me sukses e përfundojnë këtë kualifikim, do të pajisen me diplomë sipas standardeve të BTEC”, tha tutje Nagavci.

Ministrja shtoi se afati është deri më 14 nëntor 2024./Arbresh.info

Për më shumë detaje, kliko KËTU