Ministrja e Arsimit, Arbërie Nagavci, ka bërë të ditur se në bashkëpunim me MINT-in dhe inspektoratin kanë realizuar vizita nëpër librari që diskriminojnë me çmimet.

Ky reagim i Nagavcit vjen pas ankesës së deputetit Enis Karvani për çmimet e librave të komuniteteve.

“Pas rezultatit të mirë që kemi pasur që për herë të parë në qeverinë Kurti të kemi tekste për fëmijët e komuniteteve në gjuhën e tyre, duhet të kujdesemi që ata nuk diskriminohen në lidhje me çmimet. Për këtë arsye në bashkëpunim me MINT-in dhe inspektorët e autoritetin mbikqyrës, kemi pasur vizita në librari dhe kemi identifikuar shkelje, në disa raste janë shqiptuar dënime ndaj shtëpive botuese të cilat nuk e kanë respektuar legjislacionin në fuqi”, u shpreh Nagavci në Kuvendin e Kosovës.

“Ju njoftoi që zyrtarë nga Ministria e Arsimit kanë kontaktuar me shtëpi botuese sepse sivjet nuk ka asnjë arsye që çmimet për këto tekste të jetë më i lartë. Derisa në vitin e parë kur janë botuar këto tekste kanë pasur arsyetim që çmimet mund të jenë të shtrenjta për shkak të përkthimeve që i kanë bërë, sivjet janë të njëjtat tekste që kanë qenë në vitin paraprak dhe nuk ka arsye për rritje të çmimit”, tha Nagavci./Arbresh.info