Sot në Qendrën e Kulturës “Rexhep Mitrovica” është bërë promovimi i Trilogjisë së librave “Gjergjat në drita përkrenaresh” të autorit Avni
Dehari i cili në vete përfshin romanet “Dragoi“, “Udhëkryqi”, dhe “Flakadanët e lirisë“.

Të pranishëm me rastin e përurimit të kësaj trilogjie ishin nënkryetari i komunës, Faruk Mujka, drejtorë komunal, asamblistë dhe nxënës të shkollave
fillore.

Nënkryetari i komunës, Faruk Mujka e ka vlerësuar lartë kontributin e autorit jo vetëm për çështje kombëtare por edhe interesimin e tij që gjeneratave të reja tu ofrojë një pasuri letrare mbi figurën historike të Gjergj Kastriotit – Skënderbeu, i cili duhet të jetë frymëzim për kombin dhe gjeneratat e reja.

Autori Avni Dehari, është shprehur të jetë i lumtur që sot ndodhet në qytetin e Mitrovicës, ku në mesin e nxënësve, të cilëve edhe i dedikohet ky botim po bëhet edhe promovimi i kësaj trilogjie.

“Unë e kam bërë librin, por një punë shumë të madhe kanë bërë edhe organizatorët e këtij përurimi që kanë marrë përsipër jo vetëm ta botojnë këtë libër, por edhe ta shpërndajnë në biblioteka, shkolla, madje edhe falas, sepse libri ofrohet për fëmijë dhe të rinj dhe kjo më gëzon më shumë
sesa ky libër të ishte shitur me miliona euro”,- tha autori i trilogjisë “Gjergjat në drita përkrenaresh”, Avni Dehari.

Autori me mjeshtëri të rrallë përshkruan mesjetën shqiptare dhe epokën e heroit tonë kombëtar, ndërsa nxënësit do të kenë mundësi që falas të pajisen me këtë trilogji, u tha me këtë rast.

“Brezat e tashëm dhe të ardhshëm të lexuesve të të gjitha moshave, veçanërisht fëmijët dhe të rinjtë, do ta kenë më të afërt, më të gjallë dhe më kumbuese epokën e artë të Gjergj Kastriotit Skënderbeut falë kësaj trilogjie”,- u shpreh redaktori Rushit Ramabaja.