Ministri i Infrastrukturës, Pal Lekaj, i ftuar në emisionin DPT te Fidani, ka thënë se autostrada e cila e lidh Prishtinën dhe Shkupin është më 100% e sigurt, dhe fjalët se ajo nuk është e sigurt mund të jenë për inate personale.

“Unë mendoj se është rruga më e sigurt në rajon. Nëse ka informata se ajo nuk është e sigurtë, kompania Bechtel Enka duhet të merret me to” tha Lekaj.

Gjithashtu ai shtoi gjithashtu se qeveria i ka dhuruar qytetarëve një projekt të sigurt, raporton Gazeta Express.

“Qytetarëve i kemi dhuruar një projekt të sigurt. Dhashtë Zoti të mos ketë kurrë aksidente. Nuk janë të vërteta fjalët që thonë. Gjatë ndërtimit, autostradën e kemi mbikëqyrur 24 orë” shtoi Lekaj.

Ai madje tha se mendimet se autostrada nuk është e sigurt, janë thënë për inate personale.

“Nëse ka pretendime se nuk është e sigurt, Bechtel Enka do të jap sqarime. Gjithashtu mund të deklarohet edhe kompania mbikëqyrëse. Ata mund të deklarohen mbi këto pretendime” tha ai.

Autostrada “Arbën Xhaferi” u inaugurua më 29 maj të këtij viti. Të pranishëm, përveç liderëve të Kosovës, ishin edhe kryeministri i Maqedonisë së Veriut, Zoran Zaev dhe ai i Malit të Zi, Dusko Markovic.