Gjatë ditës së nesërme, Lëvizja Vetëvendosje ka paralajmëruar protestë para objektit të Prokurorisë së Shtetit.

Për këtë protestë të Vetëvendosjes, ka reaguar kryeministri Ramush Haradinaj.

Përmes një postimi në profilin e tij zyrtar, Haradinaj ka thënë se Kosova është një shoqëri demokratike ku liria e shprehjes dhe protestës është një e drejtë e garantuar.

Sipas tij, protesta kundër korrupsionit, me kërkesën për dorëheqjen e bartësve të pozitave të larta në sistemin e drejtësisë, si pushtet i ndarë, është e drejtë qytetare dhe politike.

Haradinaj ka ftuar Lëvizjen Vetëvendosje që të t’i shteroj të gjitha rrugët institucionale.

Postimi i plotë i Haradinajt pa ndërhyrje:

Kosova është një shoqëri demokratike ku liria e shprehjes dhe protestës është një e drejtë e garantuar.

Protesta kundër korrupsionit, me kërkesën për dorëheqjen e bartësve të pozitave të larta në sistemin e drejtësisë, si pushtet i ndarë, është e drejtë qytetare dhe politike.

Por, presioni i rrugës mbi drejtësinë është precedent që nuk i kontribuon vendosjes së saj.

Lëvizjen Vetëvendosje, si subjekt i respektueshëm parlamentar, e ftoj të shterojë të gjitha rrugët institucionale, të përdorë së pari interpelancat parlamentare, tryezat politike dhe debatet me ekspertët për sistemin e drejtësisë.