Ka filluar intervistimi i ish-drejtorit të Policisë, Shpend Maxhunit, para deputetëve, anëtarë të Komisionit hetimor parlamentar në lidhje me ndriçimin e rastit të dëbimit të gjashtë shtetasve turq.

Me kërkesë të deputetit të AAK-së Muharrem Nitaj, u vendos që intervistimi të bëhet pa praninë e mediave.

Deputetët nuk kanë bërë të ditur për kohëzgjatjen e intervistimit. Kryetari i këtij komisioni, Xhelal Sveçla ka thënë se kjo varet nga përgjigjet që do të marrin.

Maxhuni po intervistohet në cilësinë e Drejtorit të Përgjithshëm të Policisë, pozitë kjo të cilën e mbante gjatë kohës së dëbimit të shtetasve turq nga Kosova për në Turqi.

Maxhuni tani mban pozitën e drejtorit të Agjencisë Kosovare të Intelegjiencës.

Pozitën e njëjtë gjatë kohës së dëbimit e mbante Driton Gashi i cili ishte shkarkuar nga pozita për shkak të dëbimit të shtetasve turq.